မမြရင်ရဲ့ လွမ်းပိုဖွယ်ရာ (ဆူးငှက်)

Posted on Posted in သဘင်

မမြရင်ရဲ့ လွမ်းပိုဖွယ်ရာ

မမြရင်ရဲ့ဇာတိရွှေဖလားကန်ရွာကို ၂၀၀၄ ခုနှစ် နိုဝင်ဘာ ၁၁ ရက်နေ့က ရောက်သွားတယ်။ ရွာကလေးက တကယ့်အညာကျေးလက်ရွာစစ်စစ်လေးပါ။ ဖုံထူထူလှည်းလမ်းကြောင်း၊ ရှားစောင်းပြာသာဒ်ပင်၊ ရွာလယ်ဇရပ်…၊ နွားအုပ်ဆိတ်အုပ်၊ ရေစည်လှည်း…၊ ထန်းရွက်မိုးတဲ… စတဲ့ အညာကျေးလက် ပုံရိပ်တွေနဲ့….

လေဘာတီမမြင်ရင် web
လေဘာတီမမြင်ရင်

 

လေဘာတီမမြရင်အကြောင်း သတိတရရှိလို့ ဆက်ပြောချင်ပါသေးတယ်။ လေဘာတီမမြရင် အနှစ် ၁၀၀ ပြည့် မန္တလေးအငြိမ့်အလွမ်းပြေ ဗွီစီဒီလေးရိုက်ဖြစ်ကြတော့ မမြရင်ရဲ့ဇာတိရွှေဖလားကန်ရွာကို ၂၀၀၄ ခုနှစ် နိုဝင်ဘာ ၁၁ ရက်နေ့က ရောက်သွားတယ်။ ရွာကလေးက တကယ့်အညာကျေးလက်ရွာစစ်စစ်လေးပါ။ ဖုံထူထူလှည်းလမ်းကြောင်း၊ ရှားစောင်းပြာသာဒ်ပင်၊ ရွာလယ်ဇရပ်…၊ နွားအုပ်ဆိတ်အုပ်၊ ရေစည်လှည်း…၊ ထန်းရွက်မိုးတဲ… စတဲ့ အညာကျေးလက် ပုံရိပ်တွေနဲ့ ရွာလေးပါ။ ဒီလိုရွာလေးက နိုင်ငံကျော်ပြည်သူချစ်အနုပညာရှင်ကြီးတစ်ဦး ပေါ်ထွက်ခဲ့ တယ်ဆိုတာ ထူးခြားအံ့သြဖွယ်ရာ ဆိုပေမယ့် မြန်မာပြည်က အနုပညာရှင်ကြီးတွေ အတော် များများကလည်း ဒီလိုကျေးလက်ကပဲ မွေးဖွားပေးခဲ့ကြတာမဟုတ်ပါလား။
ဘယ်လိုမှကြားခံအဆက်အသွယ်မရှိဘဲ မေးမြန်းစုံစမ်းပြီး ရွှေဖလားကန်ရွာကိုရောက်ကြတော့ နောက်ပေါက် ရွာခံလူငယ်လေးတွေက “လေဘာတီ မမြရင်”ဆိုတာမသိကြတာများတယ်။ တစ်ယောက်စကားတစ်ယောက်နားနဲ့မို့ မမြရင်ရဲ့ညီအစ်မ၀မ်းကွဲ အသက် ၈၀ ကျော်အရွယ် ဒေါ်လှငွေတို့၊ ဒေါ်ပုမတို့နဲ့တွေ့ပြီးမှ ဇာတ်ရည်လည် အဆင်ပြေတော့တာပေါ့။ ဒေါ်လှငွေရဲ့အိမ်မှာ မမြရင်ဓာတ်ပုံလေး ချိတ်ထားတယ်။ မမြရင်ရဲ့အဖိုးနဲ့အဖွားက ဦးကုလား၊ ဒေါ်နွယ်တဲ့။ သူတို့ဇနီးမောင်နှံကမွေးတာက မမယ်မှုံတဲ့။ မမယ်သုန်တဲ့။ မဉာဏ်ရုံတဲ့။ ဦးခန့်တဲ့။ မဉာဏ်ရုံက ရွာမှာ ဆိုင်းမင်းသမီးတဲ့။ ဖောင်တော်ဦးဘုရားပွဲမှာ တောင်ရွာ မြောက်ရွာ အပြိုင်ကကြရင်း တောမင်းသား ကိုဖိုးသစ်နဲ့တွေ့ကာ အကြောင်းပါကြသတဲ့။ ကိုဖိုးသစ်ရဲ့အဖေကလည်း မင်းသားပဲတဲ့။ ကိုဖိုးသစ်နဲ့ မဉာဏ်ရုံအကြောင်းပါပြီး မွေးလာတာက ငယ်မည်မလှရင်လို့ခေါ်တဲ့ မမြရင်ရယ်၊ ကိုဘခင်ရယ် နှစ်ယောက်ထဲပါ။
မမြရင်တို့ရွှေဖလားကန်မှာနေတဲ့အိမ်ဝိုင်းက အုန်းခြံကြီးတွေနဲ့ဆိုကိုး…။ အိမ်ဘေးမှာ ချောင်းကလည်း စီးနေသေးသတဲ့။ ရေတွင်းလည်းရှိသတဲ့။ အဲဒီရေတွင်းကို အုန္နဲပင်တွင်းလို့ခေါ်ကြတယ်။ ကျွန်တော်တို့ရောက်လို့ မမြရင်ရဲ့အိမ်နေရာကို ပြပါဦးလို့ဆိုတော့ ရွာပြင်ဘက်ထွက်ပြီး တစ်ခေါ်လောက်က ကုန်းမို့မို့လေးနေရာကို ဒေါ်လှငွေက လက်ညှိုးညွှန်ပြတယ်။ “အဲဒီနေရာလေးက မမရင်တို့ အိမ်နေရာလေး” တဲ့လေ။ ရှိုက်သံတွေနဲ့ပေါ့။ အခုတော့ ကန္တာရပင်လေးတွေသာ ကျိုးတိုးကျဲတဲပေါက်ရောက်နေတဲ့ ကျပ်တီးကုန်းလေး…။ အုန်းခြံဆိုတာ ဝေလာဝေး…။ စမ်းရေဆိုတာလည်း အရာမျှမထင် ခန်းခြောက်ပျောက်ကွယ်ကုန်ပေါ့။
“ချောင်းကလည်း ရေအမြဲရှိတော့ ချောင်းကမ်းမှာ အုန်းခြံထဲက ခူးလို့မကုန်နိုင်တဲ့ အုန်းသီးတွေများ ကြွေကျနေတာ စီလို့…။ အုန်းပင်တွေနဲ့မို့ အရိပ်ကောင်းလိုက်တာက နေပြောက်မထိုးဘူး။ မမရင်က ရေချိုးရင် ချောင်းဘေးကရေတွင်းမှာချိုးတာ။ နေပူလေးရချိန်မှ ခေါင်းလျှော်တာ…။ သူ့ဆံပင်က လူတစ်ရပ် ဆံပင်တစ်ရပ်မို့ ရေတွင်းဘေး နေပူစာရတဲ့ကွက်လပ်လေးမှာထိုင်ပြီး ရှေ့မှာဝါးလုံးတန်းထိုးထားတဲ့အပေါ် သူ့ဆံပင်ကြီးဖြန့်ပြီး နေလှန်းအခြောက်ခံရတာလေ”တဲ့…။ ဒေါ်လှရင်က ပြောပြတယ်။
ကျွန်တော်ကတော့ လက်ရှိမြင်နေရတဲ့လွင်တီးခေါင် ကျပ်တီးကုန်းနေရာကို မမြရင်တို့အိမ်၊ အိမ်ဘေးက ရေသွင်သွင်စီးနေတဲ့ချောင်း၊ ချောင်းဘေးမှာ ရေတွင်းနဲ့ ဒီအိမ်ဝင်းကြီးကို အုပ်မိုးဝန်းရံထားတဲ့ အုန်းခြံကြီးကိုပဲ မျက်စိထဲမြင်လာတော့တယ်။ အတိတ်မြင်ကွင်းကိုပဲ အာရုံစွဲမိစဉ်မှာ နားထဲ ကြေးနောင်သံလေးနဲ့ သီချင်းတစ်ပုဒ်ကို အသံပြလိုက်သလိုကြားရတာပေါ့။ ပြီးတော့မမြရင်ရဲ့ ကြည်မြတဲ့သီချင်း… ဘာတဲ့…။
– စိမ်းလဲ့လဲ့ညိုပြာ… ယိမ်းနွဲ့နွဲ့ဆိုကာ… နေခြည်လည်းမထိုးသေးပါကလား…။ သြော်… ရေနဒီကလည်း မတိုးသေးပါကလား…။ တို့ရွာဂါမာ… မမြရင်… ဟိုယခင်နေခဲ့တဲ့ရွာ…။
– စိမ်းလဲ့လဲ့ညိုပြာ… ယိမ်းနွဲ့နွဲ့ဆိုကာ… နေခြည်ကလည်းထိုးလို့ပါလား…၊ သြော်… ရေနဒီကလည်း တိုးလို့ပါကလား…။ ရွှေပြည်စိုး…၊ ရွှေပြည်စိုး…၊ ရွှေပြည်စိုး… လွမ်းပိုဖွယ်ရာ…။
ဟုတ်ပါတယ်…။ မမြရင် ဟိုယခင် ငယ်စဉ်ကနေခဲ့တဲ့အိမ်ကလေးမှာတော့ အုန်းပင်၊ အုန်းလက်၊ အုန်းရွက်တွေနဲ့ နေခြည်နေပြောက်မထိုးရအောင် စိမ်းလဲ့အေးမြနေမှာပေါ့…။ အိမ်နဘေးချောင်းလေးကလည်း အခုလိုမိုးတွေညို့ပြီး မည်းမည်းသည်းသည်းရွာတဲ့ကာလဆိုရင် ချောင်းရေတွေလည်းတိုးမှာပေါ့…။ သီချင်းသံကဆက်ကြားရပြန်ပြီ။ အဝေးဆီကလေ…။
– မြနဲ့မောင်နဲ့အခုမှတွေ့တာ××× လူပါးမ၀ခင်တုန်းက ပြောပြတော့ ရယ်စရာပါ××× ထမီလေးတိုတိုဝတ်ကာ××× မြ ငယ်စဉ်အခါ×××၊ လူထဲမ၀င်ခင်သေးတော့ အလှအပြင် အဆင်ချာ ××× မယ်ရင်ကုန်ကုန်ပြောမယ်××× တောသက်သက်မို့ ××× ဘယက်ခွာရာ ရွှံ့တွေကပ်စီကပ်စီ၊ ပုတီးလုပ်ကာ ဆွဲရပါတယ် ××× အုန်းမှုတ်ပဲကိုရှာရှာ ××× ဒိုလာပြားကြီး ဆယ့်ငါးပြားလောက် ဆွဲရတာ ××× ကိုကိုတို့ကမြှောက်စားပေမယ့် ××× ဟိုတုန်းကလိုမပျော်ပါ ×××
လေဘာတီမမြရင်ရယ်လို့ မြန်မာတစ်ပြည်လုံး လျှမ်းလျှမ်းတောက် ကျော်ကြားနေချိန် ရွှေဒင်္ဂါးတစ်ပြား ၁၃ ကျပ်ပဲပေးရတဲ့ခေတ်မှာ မမြရင်က အငြိမ့်တစ်ပွဲ ၄၅ ကျပ်ရသတဲ့…။ ရွှေဆိုင်တန်းမှာများ နေ့ပွဲ ကထိန်ကရရင် ရွှေသည်ငွေသည်တွေသာမက မင်းစိုးရာဇာကတော်တွေကတောင် မမြရင် ၀တ်တာ စားတာ ငေးကြရသတဲ့။ စိန်အစစ်တဆင်စာ၊ ပတ္တမြားအစစ်တစ်ဆင်စာ စသည်ဖြင့် ရတနာအစစ်တွေ ချည်းဝတ်ဆင်နိုင်တာကိုး…။ ဒါပေမယ့် အဲဒီပြည့်စုံကျော်ကြားတဲ့ဘ၀ကို မမြရင်မမက်မောပါဘူး။ ရွှေလှောင်ချိုင့်ထဲကငှက်ကလေးလို ကျဉ်းကျပ်လှပါသတဲ့။ သူပျော်မွေ့မက်မောတာက ငယ်ရွယ်စဉ် ကလေးဘ၀ဇာတိ ရွှေဖလားကန်ရွာက အိမ်ဘေး၊ ချောင်းရေစပ်ရွှံ့ထဲမှာကြွေကျနေတဲ့အုန်းသီးတွေက အုန်းမှုတ်ပဲ့တွေယူ၊ အပ်ချည်ကြိုးနဲ့သီပြီး ဒိုလာပြားပုံစံလည်မှာဆွဲ…။ ချောင်းစပ်ကရွှံ့တွေခူးပြီး ပုတီးလုပ်ကာဆွဲပြီး သူငယ်ချင်းတွေနဲ့ လွတ်လွတ်လပ်လပ်ပြေးလွှားကစားရတဲ့ဘ၀ကိုပဲ မက်မောပျော်ရွှင်ပါသတဲ့။ “ဒိုလာ”ဆိုတာက အဲဒီကာလ အရှေ့အလယ်ပိုင်း အာရပ်နိုင်ငံတွေက လာတဲ့ “Dola”ဆိုတဲ့ ရွှေဒင်္ဂါးပြားတွေကိုဝယ်ပြီး အညှောက်တပ်ကာ လည်မှာဆွဲကြတဲ့ခေတ်ကိုး…။ ဒီတော့… ရွာက ကလေးတွေကလည်း အုန်းမှုတ်ခွက်ကိုဖဲ့၊ အပေါက်ဖောက် “Dola”ပြားလို ဆွဲကြတာ လေ…။ မြန်မာနှုတ်နဲ့ “Dola” က “ဒိုလာ”ဖြစ်ရတာပါပဲ။
ကိုင်း… သီချင်းလေး ဆက်နားထောင်ကြည့်ရအောင်…။
“မောင်မောင်တို့က မြှောက်စားပေမယ့် အရင်တုန်းကလောက် မပျော်ပါ။
ကျွန်မတို့ရွာကို ပို့ပါ ပို့ပါ…၊ လွမ်းတဲ့သူနဲ့တွေ့ရုံကလေးပါ…။
တယောဘယ်လိုတောတော…၊ အဆန်းဘယ်လိုပေါပေါ
နားဝင်ချိုအောင် ဘယ်လိုပြောပြော…
သဘောမကျနိုင်ဘူး အစ်ကို…၊
ရွှေပြည်စိုး…၊ ရွှေပြည်စိုး…၊ ရွှေပြည်စိုး… လွမ်းပိုဖွယ်ရာ…”တဲ့…။
တောမင်းသမီးလေး မမြရင်၊ သဘင့်တက္ကသိုလ် မန္တလေးရွှေမြို့တော်ကြီးရောက်လာတော့ ပင်ကိုအရည်အချင်းကလည်းပြည့်…၊ ပါရမီကလည်းပါတာမို့ တမဟုတ်ချင်းကျော်ကြားပြီး တက္ကသိုလ်ကျောင်းတော်သားတွေက ကိုလိုနီခေတ်မှာအလိုအပ်ဆုံးအဖိုးတန် အရာဖြစ်တဲ့ “လေဘာတီ”ဘွဲ့ကို ပေးအပ်မြှောက်စားခဲ့ရာက လေဘာတီမမြရင်အဖြစ် ထင်ရှားသွားခဲ့တယ်။ ဘယ်လိုပင် ထင်ရှားကျော်ကြားပေမယ့် မမြရင်တစ်ယောက် မပျော်ပါဘူး…။ သူ့ရွာကိုပဲ ပြန်ပို့ပေပါးတယ်။ ရွာမှာက လွမ်းရတဲ့သူ ကျန်ရစ်မှာပေါ့။ အဲဒီလွမ်းရတဲ့သူနဲ့ နှစ်ရှည်ကြာခွဲခဲ့ရလို့လည်း တစ်ခဏဖြစ်ဖြစ် တွေ့ရုံလေး ပြန်တွေ့ ပါရစေဦးပေါ့။ လေဘာတီမမြရင်ဘ၀ မှာတော့ ဘေးမှာ တူရိယာသံစုံနဲ့ နားဝင်ချိုအောင် မြှောက်ပင့်ပြောဆိုမယ့်သူတွေနဲ့ ၀ိုင်းဝိုင်းလည်နေပေ မယ့် ရွှေပြည်စိုး၊ ရွှေပြည်စိုး ရွှေပြည်စိုးလို့ အိမ်ဘေးအုန်းခြံထဲက အော်မြည်နေတဲ့ငှက်သံလေးလောက် လွမ်းဆွတ်မက်မောဖွယ်ရာမရှိဘူးတဲ့လေ…။
ကျွန်တော်ဟာ ကန္တာရပင်တွေ ကျိုးတိုးကျဲတဲနဲ့ လွင်တီးခေါင်ပမာ ကျပ်တီးကုန်းဖြစ်နေတဲ့ လေဘာတီမမြရင်ငယ်ဘ၀ အိမ်နေရာဟောင်းလေးကို ခပ်ငေးငေးစိုက်ကြည့်ရင်း အတွေးတွေထဲမှာတော့ စိတ်ကူးပုံရိပ်တွေ တဖျပ်ဖျပ်ပြောင်းလဲလို့…။
ဒီလိုနဲ့ တကယ်တမ်းမြင်ရနေတဲ့ ပစ္စက္ခပုံရိပ်တွေကဖြင့် တဖြည်းဖြည်း ဝေေ၀၀ါးဝါး…။
သြော်… မျက်လုံးအိမ်မှာ မျက်ရည်တွေပြည့်နေခဲ့တာကိုး…။

“ခရာသံစုံ… ကျူးကြော့ဉာဏ်ဟုန်…
နန်းဘုံစကြာ၊ ပန်းညို… ပန်းနီ… ပန်းဝါ…
သြော်… ပေါတဲ့နေရာ…၊ တောကွဲ့ဟေမ၀ါ…”တဲ့လေ။ သီချင်းသံက တဖြည်းဖြည်းပျောက်ကွယ်ဝေး…။

ဆူးငှက်

-ဆရာဆူးငှက်၏ခွင့်ပြုချက်ဖြင့် ဤစာမူဖော်ပြခြင်းဖြစ်ပါသည်။

ရှုခင်းသစ်

 

One thought on “မမြရင်ရဲ့ လွမ်းပိုဖွယ်ရာ (ဆူးငှက်)

  1. ရှာဖွေတင်ပြပေးတာကျေးဇူးတင်ပါတယ်။ ငယ်စဉ်ကမြန်မာ့အသံရေဒီယိုမှာကြားခဲ့ရပီးရင်ထဲမှာခုထိမမေ့နိုင်အောင်စွဲနေရတဲ့ဂန္တ၀င်သီချင်းတစ်ပုဒ်ပါဘဲ။
    နောက်ထပ်လည်းရှာဖွေတင်ပြပေးပါအုန်း။

Comments are closed.